Tiranë, 10 gusht, NOA Update - Grabitës të maskuar kanë vjedhur sot rreth orës 09.15 një sasi prej 350 mijë lekësh të reja në një nga filialet e bankës NBG, që ndodhet në rrugën e Kavajës.
Policia e shtetit përmes një njoftimi për shtyp njoftoi se një grup hetimor ka shkuar menjëherë në vendngjarje dhe po punon ende për identifikimin dhe kapjen e autorëve të vjedhjes si dhe dokumentimin e ngjarjes së ndodhur në mes të Tiranës.
Nga hetimet paraprake të grupit hetimor rezulton se, autorët kanë qenë të maskuar, njëri prej tyre edhe i armatosur.
Policia konfirmoi se autorët e ngjarjes kanë mundur të vjedhin në këtë bankë sasinë prej 350 000 lekësh të reja, sasi parash kjo që përdorej nga punonjësit e bankës për pagesa emergjente.
Drejtoria e Policisë së Qarkut Tiranë, duke marrë shkas nga kjo vjedhje, ka marrë menjëherë një sërë masash organizative në bashkëpunim me Shoqëritë e Ruajtjes dhe Sigurisë Fizike si dhe me Punonjësit e Sigurimit të Brendshëm të Bankave të Nivelit të dytë, me qëllim garantimin e zhvillimit normal të aktivitetit bankar të tyre si dhe bizneseve në përgjithësi.
Aktualisht, strukturat e hetimit të krimit të Policisë së Kryeqytetit, po punojnë intensivisht për identifikimin dhe kapjen e autorëve.
mit/NOA