Tiranë, 6 shtator, NOA – Policia e kryeqytetit ka vënë në pranga tre persona mbi akuzën e vjedhjes gjatë 24 orëve të fundit në kryeqytet.
Shërbimet policore të Komisariatit të Policisë Nr.3, në 4 shtator bënë të mundur kapjen shtetasit në kërkim Ervin Osman Haraçiu, një 28 vjeçar me banim në Tiranë, i dënuar në 7 korrik të këtij viti me një vit burg, nga Gjykata e Rrethit të Tiranës, për veprën penale të vjedhjes.
Nga oficerët e këtij komisariati të kryeqytetit është arrestuar në flagrancë edhe 20 vjeçari Emiljano Shtjefën Fukulaj.
20 vjeçari Fukulaj u kap në rrugën “Ded Gjon Luli”, duke i vjedhur nga qafa varësen e floririt, një shtetaseje.
Po kështu policia e kryeqytetit ka prangosur në orën 5 të mëngjesit të sotëm,
25 vjeçarin Elton Skënder Meta, banues në rrugën “Njazi Meka”.
Sipas burimeve nga policia e Tiranës, 25 vjeçari është kapur duke vjedhur në marketin “Toni”, pronë e një shtetasi, në rrugën e Dibrës.
Në cilësinë e provës materiale të arrestuarit iu sekuestruan 660 lekë, një palë pinca dhe 100 paketa cigare të markave të ndryshme.
Materialet e hetimit për të tre personat e arrestuar për vjedhje i kaluan prokurorisë së Tiranës për ndjekje të mëtejshme.
mit/NOA