Prishtinë, 8 shtator, NOA – Drejtori i Përgjithshëm i Policisë së Kosovës, Behar Selimi, priti në një takim në mjediset e kësaj drejtorie anëtaren e Bundestagut gjerman, njëherësh anëtare e Komitetit të Mbrojtjes së Bundestagut gjerman, zonjën Elke HOFF.
Burime nga kjo drejtori thanë për agjencinë NOA se qëllimi i vizitës se anëtares së Bundestagut gjerman ishte vizita tek trupat gjermane në kuadër të KFOR-it në Kosovë, si dhe tek Policia e Kosovës, për tu njohur me gjendjen e përgjithshme të sigurisë në Kosovë.
Drejtori i Përgjithshëm i Policisë së Kosovës e informoi zonjën HOFF lidhur me organizatën policore, situatën e sigurisë në Kosovë dhe për arritjet PK-së në luftën ndaj krimit, veçantisht krimit të organizuar, reformat e bëra në policinë e Kosovës dhe metodologjinë e re të punës.
Ndërsa anëtarja e Bundestagut gjeman, Elke HOFF theksoi në këtë takim se policia në çdo vend është gur themeltar për sovranitetin e çdo shteti.
Në takim u vlerësua me nota pozitive puna dhe angazhimi i Policisë së Kosovës në krijimin e gjendjes së sigurisë në Kosovë dhe për bashkëpunimin e ndërsjellë me institucionet ndërkombëtare.
mit/NOA