Tiranë, 10 shtator, NOA – Kontratat mes konsumatorëve dhe operatorëve do të unifikohen, duke përcaktuar në ato të rejat të drejtat dhe detyrimet e palëve.
Këtë fakt e ka bërë me dije sot gjatë një konference për shtyp, drejtori i Përgjithshëm i Politikave Tregtare në METE, Besjan Pesha bashkë me kryetarin e Entit Rregullator të Ujit, Avni Dervishi, në lidhje me unifikimin e kontratave mes konsumatorëve dhe operatorëve të Ujësjellës-Kanalizimeve, një nismë kjo që vjen në mbrojtje të konsumatorit.
Dervishi nga ana e tij, theksoi se puna për unifikimin e kësaj kontrate ka filluar dhe për momentin është në nivel ekspertesh, për të gjetur bazën e duhur ligjore.
“Ftojmë dhe institucione të tjera përgjegjëse në këtë sektor për të dhënë kontributin e tyre në këtë nismë”, tha ai.
Kurse Pesha theksoi rëndësinë e uniformizimit të kësaj kontrate midis konsumatorëve dhe operatorëve.
“Kjo kontratë jo vetëm do të jetë e njëjtë për të gjithë konsumatorët, por në të do të përcaktohen qartë të drejtat dhe detyrimet e të dyja palëve. Tashmë ka ardhur koha që çdo konsumator, jo vetëm për këtë shërbim por, për çdo lloj shërbimi tjetër, të dijë të drejtat dhe detyrimet e tij. Kjo patjetër që do të sjellë edhe përmirësime në shërbim”, u shpreh drejtori i Përgjithshëm i METE-s.
Më tej, të dy kanë sqaruar sesi kjo iniciativë për unifikimin e kontratës do të përfshijë të gjithë elementët e nevojshëm të një kontrate si orari i furnizimit, çmimi i miratuar nga ERRU, sikundër u tha se penalizimi do të jetë pjesë e kontratës.
Ndërsa për rritjen e çmimit të ujit u tha se ai do të realizohet në momentin që çdo operator depoziton tek ERRU një kërkesë të tillë dhe pas marrjes në shqyrtim, Komisioni Kombëtar Rregullator e miraton këtë rritje të çmimit.
n.e/NOA
