Durrës, 14 shtator, NOA Update – Vrasja që ndodhi mbrëmjen e sotme, rreth orës 17.40, në qytetin e Durrësit, pikërisht në afërsi të vendit të njohur me emrin “Dyqani i Dylit”, ka ndodhur për motive familjare.
Ky është konfirmimi zyrtar që policia e qytetit bregdetar jep rreth ngjarjes që e tronditi atë rreth dy orë më parë, duke pohuar se ka mundur të vërë në pranga autorin e saj, 41-vjeçarin Halil Mema.
Siç bëhet me dijeni për agjencinë e Lajmeve NOA prej burimeve zyrtare të policisë së Durrësit, autori e ka goditur fatalisht viktimën, Dritan Roçi, 35-vjeç, lindur e banues në Durrës, i martuar me 3 fëmijë, me të cilin kishte lidhje familjare pasi motra e tij e kishte bashkëshort.
E duket se konfliktet familjare, e kanë detyruar autorin që të ndërmarrë aktin e rëndë të goditjes për vdekje me anë të një thike, të kunatit të tij.
Bëhet me dijeni se menjëherë në vend kanë shkuar forcat e policisë, të cilët bënë të mundur identifikimin e kapjen brenda një kohe të shkurtër të autorit të dyshuar të ngjarjes dhe bllokimin e armës së krimit.
Nga hetimet e deritanishme rezulton se pas ngjarjes, autori menjëherë është larguar nga vendngjarja, ndërsa ndërhyrja në kohë e shërbimeve të policisë, ka bërë të mundur kapjen e tij dhe bllokimin e armës së krimit.
Tashmë, autori i ngjarjes ndodhet i shoqëruar në ambjentet e policisë dhe ndaj tij vazhdon kryerja e veprimeve proceduriale.
n.e/NOA
