Lezhë, 14 shtator, NOA – Ndërsa kishte vjedhur një makinë, vuri re se po ndiqej nga forcat e policisë e për këtë arsye, e la në mes të rrugës duke preferuar më mirë që t’ia mbathë.
Ngjarja e ndodhur që në muajin mars, e ka mbajtur në arrati prej muajsh të tërë autorin e saj, por duket se asaj i ka ardhur fundi, pasi është identifikuar nga forcat e policisë së Lezhës.
Këto të fundit e kishin shpallur si person në kërkim dhe siç bëhet me dijeni për agjencinë e Lajmeve NOA, kanë mundur ta vënë në pranga në orët e mbrëmjes së djeshme.
Fjala është për 18-vjeçarin me inicialet E.C., me banim në qytetin e Lezhës, i cili akuzohet për veprën penale të “Vjedhjes së mbetur në tentativë”, e parashikuar nga neni 134/1 dhe 22 të Kodit Penal.
Ndalimi i tij u bë për arsye se më datë 30.03.2010, ai ka vjedhur automjetin i cili është në pronësi të një personi me inicialet Z.GJ, e markes Volsvagen Golf 2 me targë LE 1855 A.
Bëhet me dije se automjeti i lartpërmendur është gjendur i braktisur më datë 31.03.2010 në superstradën Kurbin-Fushë Krujë, në vendin e quajtur “Kryqëzimi i Sanxhakut”.
n.e/NOA
