Bruksel, 16 shtator, NOA – Ndërsa akuzat e opozitës janë bërë edhe më të forta pas deklaratave nga kreu i KQZ-së për djegien e fletëve të votimit më 1 tetor, kryeministri Sali berisha ka deklaruar se “Mazhoranca është e gatshme të plotësojë të dhjetë kërkesat e PS-së, por jo atë të rinumërimit të fletëve të votimit”.
Kryeministri Berisha e bëri këtë deklaratë nga Brukseli ku nga dje, po merr pjesë në samitin e Partive Popullore Evropiane.
“Opozita ka të gjitha mundësitë për të zgjidhur krizën politike”, - tha kryeministri Berisha, duke ripërsëritur apelin e tij për Partinë Socialiste që të bashkëpunojë për ngritjen e komisionit hetimor dhe për reformat e tjera të rëndësishme në vend.
Edhe këtë herë, shefi i ekzekutivit i ka bërë të ditur selisë rozë, se lidhur me kërkesat e saj për transparencën e fletëve të votimit mund t’i drejtohet Komisionit të Venecias si dhe të ngrejë komisionin hetimor për zgjedhjet e 28 qershorit.
mit/NOA
