Nju Jork, 20 shtator, NOA – Ministri i Punëve të Jashtme, Edmond Haxhinasto zhvilloi një takim me homologun e tij turk, Ahmet Davutoglu, në kuadrin e pjesëmarrjes në punimet e Sesionit të 65-të të Organizatës së Kombeve të Bashkuara.
Gjatë takimit, dy homologët diskutuan lidhur me marrëdhëniet midis dy vendeve në kuadrin dypalësh e në atë të bashkëpunimit rajonal e të organizatave ndërkombëtare.
Haxhinasto dhe Davutoglu vlerësuan marrëdhëniet tradicionalisht të shkëlqyera shqiptaro-turke dhe diskutuan mbi rrugët konkrete të forcimit e intensifikimit të mëtejshëm të tyre.
Ministri Haxhinasto shprehu mirënjohjen për qëndrimin pozitiv dhe për mbështetjen e Turqisë ndaj shqiptarëve, e veçanërisht në qëndrimin e tyre ndaj çështjes së Kosovës.
n.e/NOA
