Bruksel, 26 shtator NOA - Një shpërthim i provokuar nga një rrjedhje gazi ka shkatërruar tre apartamente të një ndërtese në Bruksel, duke shkaktuar vdekjen e dy personave dhe plagosjen e 17 të tjerëve. Lajmi është bërë i ditur nga e përditshmja belge Derniere Heure e cila është bazuar në burime zyrtare. Ka mbetur ende dhe një person, i cili po kërkohet në rrënojat e ndërtesës.
Një prej të plagosurve është në gjendje tepër kritike. Në apartamentet e shkatërruara të lagjes së Schaerbeek banonin 11 persona. Kanë qenë me qindra personat që janë evakuuar nga zona. Megjithatë ende nuk është e sigurt se shpërthimi ka ndodhur si pasojë e rrjedhjes së gazit. Krahas apartamenteve të dëmtuara janë dhe shumë banesa të tjera të cilat janë goditur nga ky shpërthim.
r.b/NOA
