Prishtinë, 2 Tetor, NOA – Kosova ka përfituar dollarët e parë si grant ndihme, që nga koha e anëtarësimit të saj me të drejta të plota si anëtare e Bankës Botërore, më 29 qershor 2009.
Ndihma e përbërë nga 30.9 milionë dollarë mësohet se do të shkojë drejtpërdrejt në buxhetin e Kosovës për të financuar nevojat e përgjithshme të tij.
Ka qenë Bordi i Drejtorëve Ekzekutivë të Bankës Botërore i cili ka miratuar operacionin e parë të Programit për Politikën për Zhvillim të Punësimit të Qëndrueshëm që siguron mbështetje për buxhetin e Kosovës.
Ai financohet nga 10 donatorë ndërkombëtarë si Republika Çeke, Danimarka, Komuniteti Evropian (KE), Estonia, Finlanda, Italia, Norvegjia, Suedia, Zvicra dhe SHBA-të, ndërsa mësohet se nga totali prej 31 milionë dollarësh ndihma, 13.5 milionë dollarë janë në formë granti dhe 6.3 milionë dollarë të tjerë, kredi e butë nga Banka Botërore, ndërsa 11.1 milionë dollarë amerikanë janë grante nga donatorë tjerë që kanë kontribuar në këtë fond të mirëbesimit.
n.e/NOA
