Tiranë, 5 tetor, NOA - Kryeministri Sali Berisha priti sot në një takim kryetarin e ri të Gjykatës Kushtetuese, gjyqtarin Bashkim Dedja.
Kryeministri duke i uruar detyrën e rëndësishme kreut të GJK-së, shprehu bindjen se “Gjykata Kushtetuese do të luajë rolin e saj qendror në një sistem demokratik”.
Sipas kryeministrit, është mjaft me rëndësi konsolidimi i pavarësisë, depolitizimit dhe profesionalizmit të sistemit të drejtësisë, si garant i të drejtave themelore.
Shefi i qeverisë e garantoi zotin Dedja për mbështetjen e plotë të qeverisë për Gjykatën Kushtetuese në respekt të kuadrit kushtetues dhe institucional.
Vetë kreu i Gjykatës Kushtetuese, Bashkim Dedja theksoi se “Gjykata Kushtetuese do të luajë me paanshmëri rolin e saj si garant i Kushtetutës, i lirive dhe të drejtave të individëve dhe sistemit demokratik.
Bashkim Dedja, u emërua si kryetar i Gjykatës Kushtetuese dy javë më parë.
Ai ishte përzgjedhur njëherë në fillim të shtatorit si anëtar i ri i kësaj gjykate, i miratuar edhe nga kuvendi e më pas vetë kreu i shtetit e dekretoi atë si kryetar të GjK-së, dekret ky i miratuar pa hezitim nga mazhoranca.
Bashkim Dedja zëvendësoi në postin e kryetarit të Gjykatës Kushtetuese, Vladimir Kriston, afati i skaduar i të cilit në këtë post, sipas mazhorancës solli edhe ashpërsimin e marrëdhënieve me presidentin, i cili i dha përgjigje kërkesave të mazhorancës, vetëm dy javë më parë.
mit/NOA