Tiranë, 6 tetor, NOA – Një ditë pas vendimit të partive të opozitës aleate me Partinë Socialiste, që vendosën nisjen e protestave popullore në mbarë vendin me synimin rrëzimin e qeverisë Berisha nga pushteti, Kryetari i Partisë Bashkimi për të Drejtat e Njeriut, Vangjel Dule, një nga aletatët, në një konferencë për shtyp mbrojti idenë se “protestat e opozitës janë mundësia e vetme që në Shqipëri të zhvillohen zgjedhje të lira e të ndershme”.
Sipas kreut të PBDNJ-së, protestat, të cilat do të nisin pas 15 tetorit, do të jenë protesta me kërkesën për mbajtjen e zgjedhjeve të parakohshme, për nxjerrjen sipas tij të vendit nga kjo krizë e gjithanshme në të cilën e ka futu kjo mazhorancë në pushtet, që sipas opozitës i vodhi votat e 28 qershorit.
Kreu i PBDNJ-së, ka ripërsëritur se ekonomia shqiptare është në një krizë të thellë dhe se biznesi është tërësisht i asfiksuar nga vendimet e qeverisë, që kanë vënë në vështirësi ekonomike biznesin, sikundër ishte edhe vendimi për vendosjen e kasave fiskale, për të cilat protestuan pak ditë më parë edhe vetë tregtarët e vegjël në kryeqytet.
Zoti Dule i bëri apel kryeministrit berisha të thërrasë zgjedhje të parakohshme, për shkak të situatës së rënduar politike dhe ekonomike në vend.
Duke iu referuar akuzave për korrupsion e përfshirje në biznese me mafian, Dules nënvizoi se shqiptarët janë në vështirësi të mëdha ekonomike, duke theksuar se “menuja e vetme e tyre janë skandalet e ministrave”.
Vendimi për rifillimin e protestave popullore në vend, u mor dje në takimin që kryesocialisti Edi Rama pati me krerët e partive të vogla aleate të PS-së, me PSD-në e Skënder Gjinushit, partinë për “Ligj e Drejtësi” të Spartak Ngjelës, atë PDS të Paskal Milos, PBDNJ-në e Vangjel Dules dhe G99 të Erion Veliaj.
Takimi u zhvillua si për ironi pikërisht në selinë e G99, mu përballë pallatit ku banon kryeministri Sali Berisha, seli e cila tashmë i takon “Opozitës së Bashkuar”.
mit/NOA