Prishtinë, 15 tetor, NOA – Kuvendi i Kosovës, mund ta anulojë votimin e seancës së djeshme plenare për strategjinë për privatizimin e Postë-Telekomunikacionit të Kosovës, e cila u miratua dje me 47 vota pro.
Një fakt të tillë e ka deklaruar vetë kryetari i Kuvendit, Jakup Krasniqi, i cili në të njëjtën kohë mban edhe postin e presidentit momentalisht, duke pohuar se “nuk do ta nënshkruajë strategjinë, pa patur një konsensus të plotë nga partitë politike”.
E duke ditur se opozita e ka kundërshtuar këtë vendim, gjë që e tregoi edhe me bojkotin e djeshëm parlamentar të votimit të tij, Krasniqi tha se strategjia mund të kthehet sërish në votim.
Lidhja Demokratike e Kosovës, edhe pse në bashkëqeverisje me Partinë Demokratike, të kryesuar nga kryeministri Hashim Thaçi, e ka kundërshtuar privatizimin e Postë-Telekomunikacionit të Kosovës.
Ndërsa lëvizja “Vetëvendosje” e quajti sot “puç qeveritar” mënyrën e miratimit të strategjisë për privatizimin e PTK-së.
n.e/NOA
