Fier, 16 Tetor 2010 NOA – Gruaja e shtëpisë, si çdo ditë edhe sot herët në mëngjes, e ka nisur ditën duke bërë kafenë për vete, të birin por dhe për nusen.
Pasi e ka bërë gati, Aishe Bytyçi ka thirrur të rrufisin kafenë, djalin e saj Eduardin dhe të shoqen e tij, Lulietën.
Sapo kanë nisur të shijojnë kafenë, që të tre janë përballur me simptoma të toksikimit.
Në gjendje kritike kanë shkuar në spitalin e Fierit, të shoqëruar me makinë nga të afërm dhe fqinjë.
Rruga nga banesa e tyre në fshatin Vanaj të komunës Libofshë e deri në spitalin e qytetit Fier, ka rënduar gjendjen shëndetësore.
Atje, ndërhyrja e mjekëve u ka shpëtuar jetën, por gjendja e tyre gjithsesi është ende serioze.
Policia ka kryer hetime dhe ka zbardhur ç’kishte ndodhur, gjithnjë sipas dëshmive të familjeve.
I shoqi i gruas që bëri kafenë tha se kishte mbushur një bidon plastik 1.5 liëtrsh me helm bar miu.
E shoqja kur ka dashur të hedhë ujë në xhezve për të bërë kafenë, nuk e dinte se bidoni që kishte afër, ishte jo me ujë por me helm dhe me të ka përgatitur kafenë e mëngjesit.
Policia tha gjithsesi se po e heton ngjarjen dhe versionin e dhënë për helmin të mundshëm aksidental.
e.r/NOA
