Halkidhiki, Greqi, 24 Tetor 2010 NOA – Një grua e re shqiptare është vrarë në Halkidhiki të Greqisë, brenda në banesën e saj, raporton korrespondenti i agjencisë NOA.
Viktima, të cilës nga policia iu publikuan vetëm inicialet G.H., dha frymën e fundit pak orë më vonë në qendrën shëndetësore Kasandrias ku u dërgua në gjendje kritike për jetën.
Ishte vetë i shoqi 33-vjeçar i gruas i cili telefonoi në qendrën shëndetësore dhe kërkoi ndihmë për të transportuar në urgjencë gruan e tij.
Në pak minuta, në banesën e çiftit, në lokalitetin Pevkohori të Halkidhikisë, mbërriti autoambulanca e cila transportoi të plagosurën.
Por vetëm pak orë më vonë, 34-vjeçarja humbi jetën në spital, me gjithë ndërhyrjen e mjekëve që po përgatiteshin ta dërgonin në spitalin e Selanikut për ndihmë më të specializuar mjekësore.
Bashkëshorti deklaroi për policinë se e kishte gjetur të plagosur, qëlluar me thikë në kraharor gruan e tij dhe menjëherë kërkoi ndihmën e spitalit.
Policia tha se ka ndaluar bashkëshortin e viktimës për të sqaruar rrethanat në të cilat ndodhi ngjarja, për të cilën ai tha se nuk ka gisht.
n.s/NOA
