Uashington, 29 tetor, NOA – Evropa Perëndimore duhet të ndalë deportimin e romëve në Kosovë, pasi atje ata po përballen me diskriminim të gjerë dhe abuzime të të drejtave të njeriut. Kjo është thirrja që grupi i njohur për të drejtat e njeriut në botë “Human Rights Watch” u ka bërë autoriteteve më të larta evropiane mbi dëbimin e romëve drejt Kosovës, duke cituar se ata nuk i gjejnë atje kushtet e përshtatshme për të jetuar, ndaj kthimi i tyre duhet të bëhet i menduar mirë.
HRW ka cituar në raportin e tij ato që i ka identifikuar si probleme serioze të të drejtave të njeriut me të cilat përballen romët që kanë imigruar në Perëndim gjatë dekadës së kaluar dhe që u kthyen më pas mbrapsht.
Raporti thotë se romët e kthyer kanë përjetuar vështirësi për të marrë dokumenta identifikimi dhe në marrjen e të drejtave të pronësisë, si edhe vështirësi në strehim, kujdes shëndetësor dhe shërbimet sociale.
Ndërkaq, pak javë më parë politikanët dhe përfaqësuesit e organizatave për mbrojtjen e të drejtave të njeriut kanë kërkuar nga autoritetet gjermane, që ta ndalin dëbimin e romëve, të cilët nuk kanë bazë ligjore për qëndrim në Gjermani, dhe dërgimin e tyre në Kosovë.
Njëri nga nënshkruesit e thirrjes është edhe ish-ministri federal dhe ish-përfaqësuesi i lartë i bashkësisë ndërkombëtare në Bosnjë Hercegovinë, Kristijan Shvarc Shilling, i cili tha se “politikanët duhet të mendojnë për fatin e njerëzve konkret” dhe shtoi se veçanërisht romët e rinj në Gjermani janë të integruar mirë.
“Kështu mijëra njerëz po shtyhen në fatkeqësi”, tha Shilling.
n.e/NOA
