Tiranë, 30 tetor, NOA – Pak minuta pas deklaratës së kryeministrit Sali Berisha nga Marikaj, reagoi edhe selia rozë përmes anëtares së Asamblesë Kombëtare të saj, Megi Ajtyresa, e cila i kujtoi kryeministrit se vizat i hoqi Evropa dhe jo qeveria, e cila vodhi votat për të vjedhur Shqipërinë.
Ajtyresa theksoi në një konferencë të shkurtër për shtyp se “Sali Berisha e ka fajin që krimi dhe korrupsioni bllokuan integrimin e Shqipërisë duke sjellë refuzimin e BE për statusin e vendit kandidat”.
Andaj në këtë kontekst, sipas Ajtyresës kryeministri dështoi e s’i mbetet tjetër rrugë, përveçse të largohet nga pushteti.
Anëtarja e Asamblesë Kombëtare të Partisë Socialiste, Megi Ajtyresa e përfundoi reagimin nga selia rozë me thirrjen se “Shqipëria do transparencë, drejtësi, zhvillim”.
Pak para reagimit të Partisë Socialiste, kryeministri Sali Berisha tha nga Marikaj ku inauguroi ujësjellësin e ri se liberalizimi i vizave ishte meritë e qeverisë shqiptare.
Më tej shefi i qeverisë siguroi opozitën se po shqyrtonte me vëmendje ofertën e opozitës dorëzuar nga Edi Rama në tryezën e parë për reformën zgjedhore duke e garantuar atë, se do t’i kthente përgjigje të henën, në 1 nëntor.
mit/NOA