Bruksel, 31 tetor, NOA - Bashkimi Evropian ka shprehur shqetësime lidhur me importin e krimit nga Ballkani në vendet anëtare, me liberalizimin e vizave.
Një raport të EUROPOL, organizata përgjegjëse për bashkërendim të aktiviteteve të policive të vendeve anëtare, vlerëson si serioze situatën e vendeve të Ballkanit dhe shtrirjen e aktiviteteve kriminale në eurozonë.
“Ballkani jo vetëm që paraqet zonë transitore, por imponohet edhe si burim i madh i grupeve kriminale, të cilat pas liberalizimit të vizave, veprimin e shtrijnë në qendrat evropiane”, thuhet në raportin e EUROPOL.
Nw raport bëhet thirrje që vendet e Ballkanit duhet të angazhohen për bashkëpunim më efikas dhe më të mirë ndërshtetëror dhe në relacion me vendet e BE-së.
BE nga fillimi i këtij viti ka miratuar formimin e njësisë së re të EUROPOL e cila do të ballafaqohet me krimin që vjen nga Evropa Juglindore.
“Ballkani vlerësohet si një nga rajonet e ndjeshme për interesat e BE-së si dhe një territor transitor por edhe burim i disa llojeve të paraqitjeve të krimit të organizuar. Andaj ne kemi parapërgatitur struktura të reja në kuadër të EUROPOL për t`u ballafaquar me këto sfida”, ka theksuar Lazlo Sago nga EUROPOL.
Komisioni Evropian ka rekomanduar në raportet e vazhdueshme vjetore që vendet aspirante në BE duhet të intensifikojnë luftën kundër krimit të organizuar dhe korrupsionit. Edhe raporti i radhës i KE-së për një pjesë të konsiderueshme të vendeve të Ballkanit Perëndimor e nënvizon problemin e krimit të organizuar dhe korrupsionit. NOA/INA
