Shkodër, 10 nëntor, NOA – Reshjet e dendura të shiut kanë rikthyer situatën e përmbytjeve në malësinë e Mbishkodrës.
Si pasojë e fryrjes nga reshjet e dendura të rënda një natë më parë mësohet se kanë dalë nga shtretërit e tyre lumenjtë Dom dhe Navreda, duke vërshuar mbi rrugën që lidh Shkodrën me Hanin e Hotit, e cila tashmë duket të jetë bllokuar.
Sikundër mësohet dhjetëra shtëpi janë nën ujë dhe mbi 20 të tjera rrezikojnë të shemben duke lënë në mëshirë të fatit banorët e zonës së Kanicës, nga vërshimi i përroit Vukpalaj në Malësinë e Madhe.
Drejt veriut është nisur edhe Shtabi i Emergjencave Civile, i cili pritet të nisë pas pak edhe evakuimin e banorëve të zonës, pasi për shkak se reshjet nuk pushojnë rreziku i jetëve të tyre është nën kërcënimin e përmbytjes.
Në fshatin Kanicë ndodhen edhe forcat e ushtrisë të cilat po ndihmojnë në evakuimin e banorëve të fshatit.
Situata është e tillë që prej dy ditësh, kur në tërë vendin ka patur shira të rrëmbyeshëm dhe furtunë.
Madje nga reshjet e dendura dhe vërshimi i ujërave janë dëmtuar edhe disa ura lidhëse të zonave përreth.
Por, situata e përmbytjeve është e përkeqësuar edhe në rrethin e Tropojës, pas daljes së lumit Valbonë nga shtrati për shkak të reshjeve të dendura.Vijon...
mit/NOA