Tiranë, 21 nëntor, NOA , Update – Një prej pistave që po hetohet nga policia për gjetjen e autorëve të vrasjes së ndodhur sot në rrugën “Jordan Misja” është ajo e hakmarrjes.
Ky është varianti zyrtar që ka dhënë sot Policia e Tiranës për ngjarjen e rëndë, ku mbeti i vrarë 44-vjeçari, Mirash Pal Preka, lindur në Pukë dhe banues në Paskuqan Tiranë.
Gjithashtu policia ka dhënë detaje dhe për zhvillimin e ngjarjes. Sipas njoftimit zyrtar vrasja ka ndodhur rreth orës 09.00, në rrugën “Jordan Misja”, afër shinave të trenit.
Viktima është qëlluar me armë zjarri disa herë dhe ka gjetur vdekjen e menjëhershme.
Policia ka përqendruar vëmendjen në pistën e hakmarrjes, pasi dyshohet se viktima ka qenë përfshirë në një vrasje që ka ndodhur rreth 6 muaj më parë në Greqi.
Preka mësohet se në grindje e sipër ka vrarë me thikë një të njohurin e tij.
a.k/NOA
