Tiranë, 22 nëntor, NOA – Trafiku i bllokuar sot në kryeqytet edhe për shkak të reshjeve të dendura të shiut ka revoltuar shefin e Bashkisë së Kryeqytetit, njëherësh shefin e Partisë Socialiste, Edi Rama, i cili në një prononcim të shkurtër pak minuta më parë për mediat ka akuzuar qeverinë se po orkestron bllokimin e trafikut në kryeqytet me qëllim që të fajësojë Bashkinë e Tiranës.
Kryebashkiaku Edi Rama bëri fajtor të gjendjes tejet të rënduar të trafikut kryeministrin Sali Berisha dhe ministrin e Brendshëm, Lulzim Basha, të cilët sikundër tha zoti Rama po keqpërdorin policinë.
Sot është bërë një akt barbar me trafikun në Tiranë, tha kryeqeveritari i Tiranës, duke theksuar se policia po tensionon qëllimisht qytetarët për të sulmuar bashkinë.
Ai sqaroi qytetarët se fajin për bllokimin e trafikut në kryeqytet për orë e orë të tëra nuk e ka bashkia, por qeveria, e cila refuzoi marrjen e kredisë për ndërtimin e Unazës së re të Tiranës.
Sakaq, kryetari i Bashkisë së Tiranës i kërkoi prokurorisë të nisë hetimet për këtë akt të shëmtuar të bllokimit të trafikut, një akt që tregoi se policia abuzoi duke ndjekur sipas Ramës urdhrat e kreut të dikasterit të Brendshëm. Vijon...
mit/NOA