Prishtinë, 8 dhjetor, NOA – Kur mbeten vetëm katër ditë nga zhvillimi i zgjedhjeve të jashtëzakonshme në Kosovë, sot është përgjakur kufirit që ndan Serbinë me Kosovën. Sipas policisë së Kosovës në kufirin Jarinë është ekzekutuar me armë zjarri Shefko Salkoviç, i cili ishte anëtar i koalicionit boshnjak “Vakat” në Kosovë, që mbron të drejtat e minoritetit boshnjak që jeton në territorin e shtetit të Kosovës.
Policia e Kosovës, informoi se Salkoviç ishte boshnjak nga Rvatska që ndodhet në komunën e Leposaviçit.
Përkatësinë e Salkoviçit në koalicionin boshnjak “vakat” e ka pohuar edhe Sadik Idriz, anëtar i këtij koalicioni.
Ngjarja ndodhi pas orëve të drekës në pikën kufitare mes kosovës dhe Serbisë, ndërkohë që viktima ishte duke udhëtuar me makinë në shoqërinë e një personi tjetër, i cili ka mbetur po ashtu i plagosur.
Por, ndërsa ky aksion vrastar ndodh në prag të zgjedhjeve që do të mbahen në 12 dhjetor, pra këtë të dielë, policia e Kosovës ende po punon për të zbardhur vrasjen, e cila sipas policisë nuk ka ndodhur për motive politike, por hamendohet për afera të tjera, dhe hetimi po intensifikohet në disa drejtime.
Janë ende të paidentifikuar edhe autorët e vrasjes, të cilët kishin si shënjestër të krimit, Shefko Salkoviç.
mit/NOA
