Shkodër, 9 Dhjetor 2010 NOA - Është dërguar sot në Shkodër kontingjenti i parë i ndihmave të Komuniktetit Mysliman të Shqipërisë për zonat e Përmbytura. Ky kontingjent, i përbërë nga 700 paketa me ushqime me një peshë rreth 8 tonë, është dorëzuar nga Kryetari i KMSH H. Selim Muça pranë shtabit të emergjencës në qytetin e Shkodrës.
Kryetari Muça, i shoqëruar nga anëtarë të tjerë të kryesisë, është pritur në prefekturën e Shkodrës nga Prefekti i Qarkut Shkodër Maxhid Cungu, Kryetari i Bashkisë Lorenc Luka dhe Kryetari i Këshillit të Qarkut Gjovalin Kolombi.
Drejtuesit e kryeqendrës së veriut i kanë njohur drejtuesit e KMSH me situatën e krijuar nga përmbytjet në këtë zonë si dhe me masat e marra për përballimin e kësaj gjendjeje. Ata gjithashtu kanë falënderuar Komunitetin Mysliman për solidaritetin dhe gatishmërinë e treguar për tu ardhur në ndihmë banorëve në zonat e përmbytura.
Nga ana e tij Muça, duke shprehur edhe një herë keqardhjen për banorët e dëmtuar, ka përgëzuar të gjitha instancat për punën e bërë për minimizimin e dëmeve të shkaktuara nga kjo fatkeqësi dhe duke evituar kësisoj humbjen e jetëve të banorëve në zonat e përmbytura.
Ai u ka bërë edhe një herë thirrje të gjitha bizneseve, organizatave apo institucioneve që të vazhdojnë të solidarizohen dhe të ndihmojnë banorët e këtyre zonave, duke kujtuar se çdo kontribut, pavarësisht vlerës, ka si shpërblim kënaqësinë e Zotit dhe mirënjohjen e njerëzve.
Kryetari i KMSH-së ka theksuar gjithashtu se ndihma e institucionit që ai drejton do të jetë e pakursyer për këdo që është në vështirësi dhe kontingjenti i parë i dorëzuar sot do të pasohet nga ndihma të tjera.
e.r/NOA
