Shkup, 23 dhjetor, NOA-Lëvizja qytetare ZGJOHU ka dënuar ashpër djegien e flamurit kombëtar shqiptar dhe thirjet raciste kundër popullit shqiptar nga ana e huliganëve të vetëquajtur City Park Boys.
Lëvizja ZGJOHU, gjithashtu kërkon nga Klubi i Basketbollit Rabotniçki të dënojë këtë incident të rëndë dhe të distancohet nga huliganët dhe të bëmat e tyre që në emër të përkrahjes për klubin shprehin urrejtjen për të tjerët.
Sipas deklaratës së dhënë nga kjo lëvizje, pritet që përgjegjësit të ndëshkohen dhe të gjejnë vendin e tyre para drejtësisë sa më parë në mënyrë që këto thirrje raciste dhe xheste shtazarake mos të kalojnë pa u ndëshkuar, gjë që do të inkurajonte edhe të tjerë të ndërmarrin akte të ngjajshme që janë sulm i drejtpërdrejtë kundër bashkëjetesës në Maqedoni.
Një reagim i njejtë ka pasuar edhe nga Organizata për Bashkëpunim Rajonal dhe Integrime Evropiane (OBRIE) në Maqedoni, e cila ka shprehur shqetësime lidhur me shprehjen e gjuhës së urrejtjes dhe raciste nga ana e tifozëve maqedonas.
Këto reagime vijnë lidhur me aktin e djegies së flamurit kombëtar nga tifozët maqedonas në ndeshjen e basketbollit midis “Rabotniçki” dhe “Liria në Shkup”.
a.y/NOA