E mërkurë, 19 janar 2011, NOA- Kreu i LDK-së, Isa Mustafa është shprehur ditën e sotme se, në vjeshtë do të mbahen zgjedhjet e përgjithshme . Gjatë hapjes së fushatës elektorale në Mitrovicë ai tha se, “Këto zgjedhje nuk kanë legjitimitet për institucione afatgjata, pasi ato nuk bazohen në vota të qytetarëve, por në numërim, në manipulime dhe lëshimet tjera në votime. Ata që morën numrat janë humbësit, pasi shumë shpejt do ballafaqohen me dënimin për zgjedhje të reja”. Sipas tij, institucionet që dalin do të jenë afatshkurtër, sa për të përgatitur zgjedhjet e reja dhe ligjin e ri zgjedhor, në mënyrë që në vjeshtë të mbahen zgjedhje ku kutitë mbushen nga qytetarët e jo nga PDK-ja. Ai e mbylli fjalën e tij duke theksuar se LDK-ja do të punojë në realizimin e programit të vetë, që është autentik dhe vazhdimësi e programit të kohës së drejtimit të LDK-së nga Ibrahim Rugova. a.y/NOA
