Tiranë, 26 janar 2011, NOA – Pesë ditë nga ngjarjet e rënda që shënuan demonstratën e 21 janarit që degjeneroi në akte dhune, por edhe në vrasjen e tre prej demonstruesve me armë zjarri, qindra studentë nga Tirana kanë zhvilluar sot një takim në repartin e
Forcave të Ndërhyrjes së Shpejtë në Tiranë (FNSH), efektivët e të cilit
morën pjesë në mbrojtjen e godinës së kryeministrisë dhe Parlamentit në bulevardin
“Dëshmorët e Kombit”. Studentët shprehën mirënjohjen dhe solidarizimin me aktin e forcave të rendit që i rezistuan sulmeve anarkiste ndaj institucioneve të vendit, në demonstratën e 21 janarit.
Të rinj dhe të reja nga Universiteti i Tiranës u takuan dhe u dhuruan lule efektivave
që ishin në vijën e parë të mbrojtjes së institucioneve dhe u shprehën atyre
falenderimet në emër të gjithë studentëve të Tiranës.
“Jemi këtu pranë jush në emër të të gjitha vajzave studente të qytetit të
Tiranës për t’ju shprehur mirënjohjen e thellë për mbrojtjen që ju i keni bërë
institucioneve dhe rendit kushtetues në datën 21 janar. Falë jush ne sot
ndihemi më të sigurta në jetën e përditshme, kur shkojmë në shkollë si dhe
në aktivitetet e tjera sociale e në çdo aspekt të jetës sonë”, tha një studente e Fakultetit të Drejtësisë.
Studentët u takuan edhe me efektivin e FNSH-së, Amarildo Yzeiraj, i cili në
momentin e sulmit, edhe pse ishte në një moment kritik nën breshërinë e
gurëve dhe sendeve të forta të turmës, ngriti lart flamurin kombëtar duke
mos e lënë atë të mos shkelej nga turma e irrituar.
mit/NOA
