Tiranë, 1 shkurt, NOA – Një 59-vjeçar është arrestuar dje nga Policia e Tiranës, pasi ka mashtruar dy persona duke u marrë nga 1500 euro, me premtimin për t’i punësuar në Arabinë Saudite ose në Gjirin Persik.
Autori i mashtrimit është Agim Sulo Molla, lindur në Sarandë e banues në Tiranë, administrator i firmës “Spring 92”.
Molla u kishte marrë vjet në muajin prill dy qytetarëve E. Lamaj, 31-vjeç, lindur e banues në Tiranë dhe A. Dani, 27-vjeç lindur e banues në Tiranë, shumën prej 1500 eurosh duke u premtuar se do u siguronte dokumentet dhe kontaktet.
Ai madje kishte garantuar dhe punën që do të kryenin. Në bazë të shumës së dhënë, Molla kishte premtuar se dy personat do t`i punësonte si infermier në Arabinë Saudite ose në Gjirin Persik.
Gati një muaj më vonë, në mungesë të dokumenteve, dy qytetarët kanë bërë denoncimin në polici për mashtrim. Ndaj 59-vjeçarit ka nisur ndjekja penale.
a.k/NOA
