Tiranë, 9 shkurt 2011, NOA- Gjatë fjalës së mbajtur në mbledhjen e Qeverisë, Kryeministri i vendit Sali Berisha theksoi se janë rritur investimet e huaja në vend.
Ai theksoi se në Shqipëri ekziston një klimë e favorshme për investimet e huaja.
Sipas tij Shqipëria është i vetmi vend që, “Jo vetëm nuk është rritur papunësia nga kriza, por ka pësuar rënie”.
Më tej ai tha se një raport i Komisionit Europian për vendet e rajonit, theksohet se, “Në Shqipëri 3 mujorin e tretë të vitit 2010 rritja ekonomike ishte 4.9% dhe vlerësohet si vendi që u prek apo ndjeu më pak krizën ekonomike”.
“Defiçitet pritet të ulen në Shqipëri thuhet në raport”, deklaroi kreu i ekzekutivit duke shtuar se defiçitet realisht janë ulur.
Ndërsa lidhur me inflacionin ai tha se është plotësisht i kontrolluar, vetëm 4.5 %.
Ai shtoi më tej se shkak kryesor i rritjes ekonomike është zhvillimi industrial, si dhe
rritja në mënyrë të ndjeshme e eksporteve si dhe rritja e fluksit të investimeve të huaja.
Kryeminstri Berisha përmendi edhe raportin e Organizatës së Kombeve të Bashkuara për 2011-ën.
Ai shtoi se, “Në këtë raport klasifikohen në katër grupe, “Vendet me të ardhura të larta”, ku në 2017 Shqipëria do jetë në këtë grupi. Grupi i dytë, grupi “Me të ardhura më të larta se mesatarja”, ku bën pjesë dhe Shqipëria, e cila vetëm pak vite më parë ishte vendi i fundit. Grupi i tretë, “Me të ardhura të mesme dhe të ulëta”, dhe grupi i katërt, atje ku ishim edhe ne, “Me të ardhura më të ulëta se minimalja”.
Ai shtoi gjithashtu se edhe për vitin 2011-ën parashikimet e vendosin Shqipërinë në krye të listës, në radhët e vendeve me rritje ekonomike.
a.y/NOA
