Tiranë, 11 mars 2011, NOA- Një sërë investimesh janë ndërmarrë për pavijonin i Neurokirurgjisë deri në fund të vitit, të cilat kapin shifrën e 7 milion eurove.
Si rrjedhojë e këtij investimi do të ketë aparatura moderne të cilat do të ndihmojnë në diagnostikimin e pacientëve.
Shkak për këtë është bërë një kredi e butë e shtetit Austriak për përmirësimin e shërbimit shëndetësor në vend.
“Investimi për godinën ishte 3.5 milion dollarë, por që është i lidhur me këtë investim prej 7 milion eurosh i cili do ti japë këtij shërbimi aparaturat me moderne të kohës, që do të bëjë të mundur përmirësimin e aksesit në një shërbim spitalor cilësisht më të mirë për popullatën në Shqipëri, Kosovë, Maqedoni dhe Mal të Zi”, është shprehur drejtori i QSUT-së, Saimir Ivziku.
Ndërkaq shefi i këtij pavijoni, prof. Dr. Mentor Petrela ka pohuar se deri në fund të vitit do të përfundojë blerja dhe instalimi i tyre.
“Ky është një model amerikan, i cili është përdorur nga të gjitha spitalet dhe shërbimet e neurokirurgjisë. Edhe ne jemi duke përdorur këtë model i cili u përshtatet sistemeve moderne shëndetësore” ka theksuar Petrela.
Sipas tij, sot QSUT ka vetëm një rezonancë manjetike e cila përballon një fluks prej 25 pacientësh në ditë, ndërkohë me ardhjen e aparaturave të reja do të ofrohet mundësia e një diagnostikimi më të shpejtë.
Kjo marrëveshje u miratua ditën e djeshme në Parlament, dhe nëpërmjet këtij investimi do të bëhet e mundur pajisja e këtij departamenti që është një shërbim elitar për vendin me aparatura bashkëkohore të cilat do të sigurojnë një shërbim cilësor, spitalor, të standardit europian.
a.y/NOA
