Prishtinë, 12 mars 2011, NOA – Pas tërmetit apokaliptik që goditi Japoninë dje dhe sot duke shënuar të paktën tani për tani 1000 viktima dhe mijëra qytetarë të tjerë të humbur, Kryeministri i Kosovës, Hashim Thaçi i dërgoi sot një telegram ngushëllimi homologut të tij japonez Naoto Kan. Kryeministri Thaçi në telegramin e ngushëllimit i shkruan kryeministrit Kan se “Me dhimbje të madhe mora lajmin për fatkeqësinë natyrore, që përfshiu vendin tuaj këto ditë, ku humbën jetën shumë qytetarë dhe u shkaktuan dëme të konsiderueshme materiale”.
Shefi i qeverisë së Kosovës i shprehu kryeministrit dhe popullit japonez e familjarëve të viktimave të tërmetit ngushëllimet më të sinqerta.
Kryeministri Thaçi shprehu solidaritetin dhe gatishmërinë e qeverisë së Kosovës dhe të popullit kosovar për të mbështetur popullin japonez.
“Dua të theksoj gjithashtu se Qeveria e Republikës së Kosovës është dhe do të vazhdojë të jetë përherë mirënjohëse për mbështetjen e gjithanshme që Japonia i ka dhënë Kosovës në procesin e pavarësisë dhe zhvillimit të saj”, përfundon mesazhin e tij të ngushëllimit kryeministri i Kosovës Hashim Thaçi.
Më herët telegrame ngushëllimi autoriteteve japoneze u kanë dërguar edhe Presidenti i Kosovës Behgjet Pacolli dhe Kryetari i Kuvendit Jakup Krasniqi si dhe Ministria e Jashtme e Kosovës.
mit/NOA
