Tiranë, 22 mars, NOA - Kanë mbërritur në Tiranë anëtarët e jurisë ndërkombëtare, të cilët do të merren me vlerësimin e 12 projekteve të Kompleksit të Ri Parlamentar.
Ky fakt bëhet me dijeni për agjencinë e Lajmeve NOA nga burimet zyrtare të organit legjislativ, sipas të cilave, ditën e enjte pritet edhe rezultati përfundimtar i punës së këtij grupi.
“Anëtarët e jurisë janë: Johannes Ibelings, Imad Hassan, Mario Struzzi, Agron Lufi, Florian Nepravishta”, bëjnë me dije mes të tjerash, burimet e Kuvendit.
Sipas tyre, juria kryesohet nga Johannes Ibelings, autoritet në fushën e kritikës së arkitekturës, historian arti dhe botues i shumë veprave përfshirë “Supermodernizmi”, “Arkitektura në Epokën e Globalizimit”, “Arkitektura e Shekullit XX në Hollandë”, “Planifikimi urban i shek XX në Hollandë”.
Ndërkaq, mësohet se ai është themeluesi dhe kryeredaktori i revistës pan-europiane të arkitekturës “A10 Arkitektura e Re Europiane”, ndërsa që në vitin 1989 ka organizuar një sërë ekspozitash arkitekture.
n.e/NOA
