Prishtinë, 30 mars 2011, NOA – Policia e Kosovës arrestoi në orët e para të mëngjesit tre persona të dyshuar për trafikim droge dhe konfiskoi një sasi droge të llojit kokainë. Operacioni i policisë së Kosovës u vu në lëvizje pas vjeljes së informacioneve mbi tre trafikantët duke arrestuar Nebi K. lindur më 1957-ën, Enver K. lindur më 1984-ën dhe Naser K. lindur më 1980-ën.
Gjatë operacionit u sekuestruan 2200 gramë substancë narkotike e llojit kokainë, tri vetura, tre pistoleta, një pushkë gjuetie dhe 36 fishekë, dy lap-top, një shtëpizë, gjashtë telefona dhe 330 euro.
Operacioni u mbështet nga të gjitha njësitë e nevojshme për këqyrjen e vendit të ngjarjes duke përfshirë njësitë speciale operative, njësiti i forenzikës dhe njësiti me qen K-9.
Çështjen në fjalë po e heton Drejtoria për hetimin e trafikimit të substancave narkotike në kuadër të drejtorisë së përgjithshme të policisë së Kosovës.
mit/NOA
