Tiranë, 8 prill, NOA - Presidenti i Republikës, Bamir Topi, nëpërmjet një mesazhi të veçantë, ka uruar zonjën Atifete Jahjaga me rastin e zgjedhjes në detyrën e lartë të Presidentes së Republikës së Kosovës.
“Është një moment historik për Kosovën dhe gjithë kombin shqiptar që në krye të shtetit zgjidhet një grua me integritet të lartë profesional dhe tepër të respektuar. Në emrin tim dhe të gjithë popullit shqiptar, uroj që të keni sukses të plotë në detyrën tuaj të lartë për të përballuar të gjitha sfidat që ka Republika e Kosovës drejt rrugës së përbashkët të integrimit të plotë euroatlantik!”, i shkruan ai presidentes së re.
Duke i shprehur bindjen e plotë se marrëdhëniet e shkëlqyera midis dy shteteve tona do të zhvillohen e intensifikohen më tej në të gjitha drejtimet, në të mirë të kombit tonë dhe paqes e stabilitetit në rajon.
n.e/NOA
