Prizren, 29 prill 2011, NOA- Presidentja e Kosovës Atifete Jahjaga gjatë ditës së sotme zhvilloi një vizitë në Prizren e Pejë në komandën e doktrinës dhe stërvitjes së Forcave të Sigurisë së Kosovës.
Presidentja Jahjaga, e shoqëruar nga komandanti i KFOR-it, gjenerali Erhard Buhler dhe nga ministri i Forcës së Sigurisë së Kosovës, Agim Çeku, kanë vizituar Komandën e Doktrinës dhe Stërvitjes të FSK-së në Ferizaj, ku trupat e KFOR-it janë të angazhuar për trajnimin e pjesëtarëve të FSK-së.
Gjatë kësaj vizite, Presidentja tha se Forca e Sigurisë së Kosovës është në rrugën e arritjes së kapaciteteve të plota operacionale.
Ajo tha Komanda e Doktrinës dhe Stërvitjes të FSK-së po luan një rol shumë të rëndësishëm që FSK të ketë një kapacitet të plotë dhe të jetë e përgatitur profesionalisht.
Jahjaga theksoi se i gjithë ky angazhim ka për qëllim përgatitjen dhe ngritjen profesionale të FSK-së, që ajo të jetë pjesë e partneritetit për paqe dhe pjesë aktive e NATO-s në të ardhmen. Ky është synimi dhe qëllimi ynë për FSK-në, tha ajo.
Më tej ajo vizitoi edhe Kampin fushor të KFOR-it në Prizren dhe Kampin Italian në Pejë, ku ajo u njoh me punën dhe aktivitetet e ushtarëve të KFOR-it në këto kampe si dhe nderoi ushtarët e rënë në detyrë në vitin ‘99.
Jahjaga falënderoi ushtarët e KFOR-it në për gjithë kontributin që kanë dhënë për sigurinë në vend dhe për shumë aktivitete në të mirë të komunitetit dhe komunës së Prizrenit në përgjithësi.
a.y/NOA
