Tiranë, 9 gusht 2011, NOA – Nisur nga temperaturat e larta në kulm të sezonit veror dhe për të parandaluar rreziqet me të cilat përballen konsumatorët nga ushqimet e patregtuara në kushtet e duhura higjieno-sanitare, Bashkia e Tiranës është hedhur në një aksion kontrollesh në tregjet e kryeqytetit.
Inspektorët e Bashkisë lëshuan disa akt-kontrolle, morën mostra ushqimore për t’i analizuar dhe ndërgjegjësuan tregtarët dhe qytetarët, mbi masat që duhen marrë, për të shmangur infeksionet apo helmimet me prejardhje ushqimore.
Ekspertët e baskisë ushtruan kontrolle dhe mbikëqyrën ushqimet në tregjet e “Uzinës Dinamo” dhe tek tregu i prodhimit të mishit, pranë sheshit “Avni Rustemi”.
Inspektorët e bashkisë i kërkuan tregtarëve të respektojnë kushtet higjieno-sanitare të tregtimit të ushqimeve, kryesisht atyre me bazë shtazore, si qumështi, mishi dhe peshku dhe kërkuan plotësimin e standardeve të zinxhirit ftohës të produkteve.
Gjithashtu, inspektorët e Bashkisë shpërndanë edhe fletë-palosje për qytetarët, me informacion për gjërat më të rëndësishme, që duhet të kenë parasysh gjatë blerjes dhe konsumit të ushqimit në temperaturat e larta.
mit/NOA
