Tiranë, 16 Gusht NOA/ Ariola Ymeraj – Nëse ka parti më të interesuar që të ketë ndryshime të reja në Kodin Zgjedhor, ose më saktë të eliminohen ndryshimet e bëra pak vite më parë nga marrëveshja PD-PS, ajo është Lëvizja Socialiste për Integrim.
Nënkryetari i saj, njëherazi ministër i Shëndetësisë, Petrit Vasili, doli sot para mediave duke shfrytëzuar 27 rekomandimet e bëra në raportin e OSBE/ODIHR.
“Të gjithë shqiptarët janë ndjerë mirë, kur kanë lexuar vlerësimin e raportit, që procesi i numërimit ishte i mirë dhe zgjedhjet ishin në përputhje me standardet e OSBE/ODIHR dhe standardet ndërkombëtare”, - tha Vasili.
Vasili bëri një apel ndaj thirrje partive politike që “të mos humbin kohë për fillimin e reformës zgjedhore, por të ulen në tavolinë për përmirësimin e Kodit Zgjedhor”, - duke vlerësuar se kjo është një kërkesë e OSBE/ODIHR.
Vasali tha se partia që bashkëdrejton i mbështet rekomandimet e dhëna tek raporti i OSBE/ODIHR dhe shtroi nevojën për një “reflektim të shpejtë dhe të menjëhershëm”.
a.y/e.t/NOA
