Bulqizë, 17 gusht, NOA – Minatorët e Bulqizës kanë hyrë sot në ditën e 24 të grevës së urisë. Ende nuk ka një marrëveshje mes minatorëve dhe përfaqësuesve të firmës koncensionare, ACR për pagat dhe kushtet e kërkuara.
Sot, në ambientet e minierës ku zhvillohet në kushte mjaft të rëndë greva e urisë, kanë mbërritur dhe specialistët e Agjencisë Kombëtare të Burimeve Natyrore (AKBN). Mësohet se specialistët do të vlerësojnë dëmin e shkaktuar në minierë pas ndërprerjes së punës, si pasojë e grevës.
Ndërkohë që në lidhje me grevën, institucionet shtetërore kanë mbajtur një rol asnjanës, duke kërkuar vetëm arritjen e një marrëveshje, në bazë të legjislacionit në fuqi për koncesonanet dhe kontratat e punës mes ACR dhe minatorëve.
Kërkesa kryesore e minatorëve është; rritje page nga 20-40 për qind, përmirësim të kushteve të punës, uljen e moshës së pensionit si dhe largimin e drejtorit të minierës së Bulqizës.
a.k/NOA
