Elbasan, 19 gusht 2011, NOA – Nuk kanë të sosur zjarret që po përpijnë zona të tëra në mbarë vendin në këto ditë të nxehta vere. Një zjarr i fuqishëm ka shpërthyer në mesditë në fshatin Mengël të Elbasanit duke u përhapur me shpejtësi nëpër një pyll me pisha.
Korrespondenti i agjencisë NOA raporton se terreni ku ka rënë zjarri është i thyer dhe tejet i vështirë për ngjitjen e makinave zjarrfikëse.
Policia e zonës ndodhet në vendngjarje bashkë me zjarrfikësit, porse ndërhyrja e tyre është tejet e vështirë për shkak të terrenit.
Zjarrfikësit po kërkojnë ndihmën e banorëve të zonës për shuarjen e flakëve.
Sikurse edhe ka ndodhur në tërë këto ditë aksionesh kundër zjarreve edhe banorët kanë qenë një pikë kyçe për shuarjen e tyre.
Flakët e zjarrit në Mengël, era po i ndihmon të përhapen më tej duke vënë në rrezik zonat e banuara.
Ndërkohë që vatra e zjarrit përparon shuarja e tij po bëhet ende me metoda të thjeshta nga banorët e zonës.
mit/NOA
