Tiranë, 31 gusht 2011, NOA- Presidenti i vendit Bamir Topi gjatë ditës së sotme priti në një takim aktoren e njohur italiane, Klaudia Kardinale.
Gjatë këtij takimi kreu i shtetit, e uroi aktoren për marrjen e çmimit “Pjata e Argjendtë” me motivacionin si “Ikonë e aktrimit italian”, dhe vuri në dukje faktin se vizita të kësaj natyre ilustrojnë jo vetëm marrëdhëniet miqësore e të fqinjësisë së mirë mes dy vendeve dhe popujve tanë, por edhe vlerësimin për kulturën dhe artin në tërësi, si dhe për kinematografinë në veçanti.
Presidenti Topi, duke vlerësuar interpretimet e spikatura e me nivel të lartë artistik të artistes së famshme e të mirënjohur botërisht, vuri në dukje se “interpretimet kinematografike përbëjnë një sferë të rëndësishme të shprehjes dhe të transmetimit të emocioneve e mesazheve edukuese tek njerëzit, prandaj realizimi i suksesshëm i të gjithë kompenentëve të filmit ndikon në mënyrë të drejtpërdrejtë e të qartë në përçimin e këtyre mesazheve”.
Gjithashtu Presidenti Topi i dhuroi aktores italiane si një kujtim institucional, një figurinë artistike të shenjtores shqiptare me famë ndërkombëtare, “Nënë Terezës”.
Nga ana e saj, aktorja italiane Klaudia Kardinale, shprehu vlerësimet e saj më të mira për Shqipërinë, artin dhe artistët shqiptarë, duke nënvizuar njëkohësisht rëndësinë e zhvillimit të Festivalit Ndërkombëtar Veror të Filmit në Durrës, si një ngjarje artistike tradicionale që jo vetëm evidenton vlerat e fushës së kinematografisë, por kontribuon drejtpërdrejt në ndërtimin e urave kulturore dhe forcimin e lidhjeve artistike e shpirtërore mes popujve të ndryshëm.
Aktorja me famë botërore ndodhet për vizitë në vendin tonë, si e Ftuar Nderi në edicionin e katërt të Festivalit Ndërkombëtar Veror të Filmit, që po zhvillohet këto ditë në Durrës.
Ndërkaq në takimin me kreun e shtetit, ishin të pranishëm Drejtoresha Artistike e Festivalit, Anila Varfi dhe aktori i mirënjohur shqiptar Timo Flloko.
a.y/NOA
