Nju Jork, 21 shtator 2011, NOA – Libia do të ketë gati qeverinë e re brenda një jave apo dhjetë ditëve të ardhshme. Këtë e deklaroi në Nju Jork, në prag të sesionit të 66-të të Asamblesë së Kombeve të Bashkuara, kreu i Këshillit Kombëtar të Tranzicionit, Mahmud Jibril. Ministrat e qeverisë do të mund të zgjidhen në lindje dhe në perëndim të Libisë saktësoi Jibril, duke folur para ministrave të Jashtëm të vendeve më të zhvilluara të botës në G8, që ndodhen në Nju Jork në kuadër të Sesionit të Asamblesë së Përgjithshme të OKB-së. Lajmërimi të dielën e shkuar, për krijimin e një qeverie libiane të Tranzicionit u shty për konsultime të mëtejshme. mit/NOA
