Shkup, 29 shtator 2011, NOA - Kryeministri turk, Rexhep Taip Erdogan viziton sot Shkupin në përpjekje për të nxitur bashkëpunimin e dy vendeve në sektorë të rëndësishëm si ai i ekonomisë dhe marrëdhënieve tregtare. Lajmi është bërë i ditur nga zyra e shtypit e kryeministrit Gruevski, i cili do ta presë homologun e tij turk në një ceremoni të veçantë në aeroportin e Shkupit. Të dy kryeministrat pritet të shohin nga afër mjediset e rikonstruktuara të aeroportit të ri, i cili administrohet që prej vitit 2010 nga një kompani turke, e cila ka fituar të drejtën e menaxhimit të këtij aeroporti për 20 vjet. Më pas Gruevski dhe Erdogan do të zhvillojnë një bisedë kokë më kokë, takim që do të shoqërohet nga një konferencë e përbashkët shtypi mes dy kryeministrave. Kreu i qeverisë turke pritet të takohet edhe me liderët shqiptarë, të cilët janë pjesë e koalicionit qeverisës. Vizita e Erdogan në Maqedoni shihet si një përpjekje e Shkupit për të forcuar marrëdhëniet me Ankaranë, në një kohë kur tensioni me Greqinë fqinje për çështjen e emrit nuk po gjen zgjidhje. Në këtë vizitë të tij kryeministri turk do të jetë i shoqëruar nga bashkëshortja e tij Emine, e cila do të ketë një axhendë krejtësisht të veçantë. mit/NOA
