Tiranë, 4 tetor 2011, NOA/ Arjola Ymeraj- Ndërsa më herët foli në takimin intim me ambasadorin amerikan Alexander Arvizu, Kryeministri Berisha përshëndeti edhe në ceremoninë festive të organizuar në ambientet e ambasadës amerikane. Që në fillim të fjalës së tij ai kujtoi se pritja që shqiptarët i bënë Sekretarit Amerikan të Shtetit Bejker, ishte dashuria për amerikanët nga ana e popullit shqiptar. Ai tha se në fillim të viteve ‘90 ekzistonte një mendim i gabuar për Shqipërinë, por shqiptarët treguan se miqësia mes dy vendeve do funksiononte dhe funksioni. Berisha u shpreh se, në kohën kur të tjerët vendosën të fshinin shqiptarët nga harta ishte Presidenti Uillson ai që i mbështeti shqiptarët në rrugën e pavarësisë. Sakaq ai shtoi se në vitin 1991 Presidenti Bush dhe Sekretari Bejker sollën mesazhin e lirisë, ndërsa më vonë Presidenti Klinton udhëhoqi Aleancën e Atlantikut, duke theksuar se Presidenti Bushi në komunitetin ndërkombëtar kryesoi në pavarësinë e Kosovës. Në vijim ai tha se Presidenti aktual Barack Obama firmosi anëtarësimin e Shqipërisë në NATO. “Mirënjohje për misionarët e parë diplomatik në Shqipëri, që hapën ambasadën 20 vjet më parë dhe të gjithë paraardhësit tuaj dhe për ju zoti ambasador, por dhe për qindra e qindra burra e gra, që me përkushtim të madh ndihmuan në ndërtimin e Shqipërisë. Unë jam dëshmitar i asaj kohe kur vendi ngjante me një akullnajë të vërtetë dhe ishte era e lirisë do të shkrinte akujt e këtij vendi. Ekspertët tuaj në të gjitha fushat dhanë një kontribut të jashtëzakonshëm, një mirënjohje të veçantë për Presidentin Obama për miqësinë e treguar ndaj Shqipërisë”, u shpreh Berisha. Kryeministri shqiptar theksoi se, ne jemi një komb i vogël, por gjëja më e madhe që mund ti ofrojmë kombit amerikan në shenjë mirënjohje dhe respekti është ndërtimi dhe konsolidimi i atyre vlerave të cilat kanë bërë kombin amerikan më të ndriturin në botë. Kreu i Qeverisë shqiptare e mbylli fjalën e tij në ceremoninë festive të 20 vjetorit të vendosjes së marrëdhënieve Shqipëri- SHBA, duke thënë: “Ne jemi shumë krenar për miqësinë me ju”. a.y/NOA
Në foto: Kryeministri Berisha
