Shkodër, 16 tetor 2011, NOA- Qendra Kulturore e Shkodrës “Pjetër Gaci: ka reaguar pak më parë lidhur me deklaratat e Kreut të Shtetit, ndaj deklaratave të tij lidhur me gjuhën e Kryeparlamentares Jozefina Topalli. Në reagimin e saj kjo qendër kulturore shprehet se Presidenti Topi duhet tu kërkojë falje shkoranëce dhe Shkodrës, duke i konsideruar deklaratat e tij të turpshme. “Kërkojmë me force tërheqjen publikisht të deklaratave fyese ndaj dialektit shkodran, në të cilin penat e arta që Shkodra ka nxjerrë në shekuj stolisën gjuhën shqipe! Për 50 vjet rresht do horra të tjerë qe ti i dekoron "për kontribute të shquara" e i propozon për në majën e sistemit të drejtësisë, u përpoqën t'ia ndërrojnë gjuhën Shkodrës, dhe hynë deri në vorr për të zhduk deri edhe eshtrat e atyre që shkruan vargje të pavdekshme, por Shkodra është prapë aty, zonjë krenare për traditën”, thuhet në deklaratën e qendrës “Pjetër Gaci”
Reagim i Qendrës kulturore të Shkodrës “Pjeter Gaci” lidhur me deklaratat e Presidentit të Republikës, Bamir Topi bërë një ditë më parë në qytetin e Shkodrës: Si qytetarë të Shkodrës , si përfaqësues të traditës e kulturës shkodrane, shprehim indinjatën e thellë për konsideratat e turpshme e aspak të denja për një drejtues institucioni e aq më pak për Kreun e Shtetit! Dje Shkodra priste Presidentin e Republikës por u fye nga Presidenti i Bulevardit! T'i kërkojë falje Shkodrës dhe shkodranëve, pa votat dhe mbështetjen e të cilëve nuk do të ishte atje ku është! Mbështetjen, votën dhe besimin e Shkodrës anti-komuniste dhe të qindra mijëra demokratëve e shpërdorove paturpësisht për katër vjet, dhe e hodhe me dorën tende kundër tyre me 8 maj! Kërkojmë me force tërheqjen publikisht të deklaratave fyese ndaj dialektit shkodran, në të cilin penat e arta që Shkodra ka nxjerrë në shekuj stolisën gjuhën shqipe! Për 50 vjet rresht do horra të tjerë qe ti i dekoron "për kontribute të shquara" e i propozon për në majën e sistemit të drejtësisë, u përpoqën t'ia ndërrojnë gjuhën Shkodrës, dhe hynë deri në vorr për të zhduk deri edhe eshtrat e atyre që shkruan vargje të pavdekshme, por Shkodra është prapë aty, zonjë krenare për traditën, kulturën e qytetërimin perëndimor që e ka në gen, e që as horrat, as hetuesit e prokurorët e as spiunët e Sigurimit të Shtetit nuk e zbehin dot! Gjithsesi po ta nisim prej Shkodre nji amanet të Gjergj Fishtës që do e ketë shkrujt për do si puna jote në kohë të vet në vitin 1907: "...Pra, sot për sot s'jane tue pas nga, Me u hutue me shkrimet tona, Të cilat s'pjellin napoljona, E as nuk bahen, besa, shkalle, Për me u ngjite ku bahet palle..." a.y/NOA
Në foto: Presidenti Bamir Topi
