Warning: file_get_contents(): SSL operation failed with code 1. OpenSSL Error messages: error:1416F086:SSL routines:tls_process_server_certificate:certificate verify failed in /var/www/vhosts/lajme.gen.al/httpdocs/v2/site/controllers/genel.php on line 1153

Warning: file_get_contents(): Failed to enable crypto in /var/www/vhosts/lajme.gen.al/httpdocs/v2/site/controllers/genel.php on line 1153

Warning: file_get_contents(https://www.njoftime.net/service/xml-last-ads/): failed to open stream: operation failed in /var/www/vhosts/lajme.gen.al/httpdocs/v2/site/controllers/genel.php on line 1153
Edi Rama, Për programin, Kasandrat dhe Obamizat
English

Edi Rama, Për programin, Kasandrat dhe Obamizat

Nga Alfred Lela Edi Rama ishte një twitter, një blog, një editorial dhe një libër larg fitores në zgjedhjet e radhës. Që prej së martës, ai dhe partia e tij janë një program larg. Dhe ky është një lajm i mirë për të gjithë. Si për socialistët, si për demokratët, si për opozitën në përgjithësi dhe mazhorancën në veçanti.

Është lajm i mirë sepse, më në fund, kemi opozitën që kërkuam. Kjo kolumnë vazhdimisht e ka mbajtur yryshin tek Edi Rama dhe opozitarizmi i tij allasoj ku përziheshin Obama me Chavezin, Third way me Orange Revolution. E të gjithë rrinin keq brenda një molotovi politik, shishja e të cilit spërdridhej rrezikshëm në qiellin e ulët të Shqipërisë. Por Edi Rama i iku më në fund komatozës politike, mpirja e së cilës ia bënte të besueshme një ardhje në pushtet nëpërmjet rrugës. Ai, pas kërcënimeve të para për dhunë me anë deputetësh kamikazë që kërkonin të nxirrnin një Bastijë nga Pallati i Kongreseve, u tërhoq. Në shenjtërinë e kësaj tërheqjeje dhe pensiviteti iu kthye publicistikës, blogjeve e formës më të epërme të komunikimit, librit. Politikisht, u bë më i pastër dhe më konkurrues kur hodhi në treg (një javë para librit) edhe draft-programin mbi të cilin do të mbështetet platforma elektorale e Partisë Socialiste.

Tani ai është bërë politikisht relevant, të paktën me elektoratin e tij. Çdo përpjekje për ta linçuar, edhe pse ai po luan sipas rregullave të opozitarizmit, është, para së gjithash, anti-opozitarizëm.

Po pse është inkurajuese sjellja e re politike e z. Rama dhe opozitës socialiste? Në krye fare nuk është blasfemi të jesh ideologjikisht kundër opozitës së vendit tënd, por të tërhiqesh nga konstruktiviteti i saj. Qoftë edhe me shpresën se një opozitë me program e ide bën edhe palën tjetër më programatike dhe më ideore. Së dyti, një opozitë konkurruese në vend të një opozite dekonstruktive i bën mirë ingranazhit social të vendit. M’anë tjetër nëse dyshimi është metodika që zgjedhim për ta dekriptuar programin dhe qëndrimin e ri të opozitës, duke thënë se e gjithë paja e re politike e ka fishekun në të, duhet të jemi gjithashtu gati të presim. Të presim që opozita ta argumentojë programin e saj duke paraqitur edhe pse-të, si-të dhe kur-et për të.

Programi i z. Rama është pikë së pari universal. Në të vërehet përpjekja për të mos lënë jashtë asnjë kategori sociale, duke guxuar të shkohet edhe djathtas me trajtimin që drafti i bën çështjes së të përndjekurve politikë dhe pronarëve. Siç vërehet edhe prirja nga populizmi, sidomos në dy çështje thelbësore e universale siç janë sistemi i taksimit dhe ai shëndetësor. Për përkitje, ndoshta jo dhe aq rastësore, sistemi shëndetësor universal dhe taksimi progresiv qenë e vazhdojnë të jenë në krye të axhendës së Shtëpisë së Bardhë nën demokratët e Obamas. Dy çështje, kompleksiteti dhe kontroversialiteti i të cilave rrezikojnë ta kthejnë Barack Obamën e “Yes we can” në një Jimmy Carter të “No, we couldn’t”. Gazeta "Mapo"

KOMENTE