Uashington 26 nëntor 2011, NOA/Update- Sekretarja e Shtetit Amerikan, Hillari Klinon ka uruar popullin shqiptar për festën e 99-vjetorit të Pavarësisë. Diplomatja e lartë amerikane vlerëson bashkëpunimin mes dy vendeve dhe shprehet se “Shtetet e Bashkuara janë një partner dhe një mik. I uroj të gjithë popullit të Shqipërisë më të mirat dhe pres me kënaqësi të thellojmë partneritetin tonë në vitet që do të vijnë”.
Më poshtë mund të lexonin urimin e plot të Sekretares së Shtetit Amerikan, Hillari Klinon.
“Në emër të Presidentit Obama dhe popullit të Shteteve të Bashkuara, jam shumë e lumtur të uroj popullin e Shqipërisë teksa festoni Ditën e Pavarësisë në këtë 28 nëntor.
Dy vendet tona bashkëndajnë një histori të gjatë miqësie dhe bashkëpunimi. Sot, po e forcojmë këtë partneritet ndërkohë që punojmë krah për krah në NATO dhe nxisim stabilitetin në rajon dhe kudo në botë. Vazhdojmë të mbështesim integrimin e Shqipërisë në Bashkimin Europian dhe nxisim udhëheqjen politike të Shqipërisë që të punojë së bashku për t’u siguruar që vendi të ecë përpara. Populli shqiptar do një qeveri transparente, udhëheqje që jep llogari dhe institucione të forta demokratike që do të ndihmojnë për të ndërtuar një të ardhme të begatë dhe të sigurtë. Shtetet e Bashkuara do të vazhdojnë të qëndrojnë vendosmërisht me popullin e Shqipërisë teksa punojmë sëbashku për t’i arritur këto synime.
Ndërkohë që festoni këtë ditë të veçantë, duhet të dini që Shtetet e Bashkuara janë një partner dhe një mik. I uroj të gjithë popullit të Shqipërisë më të mirat dhe pres me kënaqësi të thellojmë partneritetin tonë në vitet që do të vijnë”.
a.k/NOA
