Beograd, 13 dhjetor 2011, NOA – Ndërsa Presidenti serb Boris Tadiç pohoi në Itali se Serbia nuk do ta njohë kurrë Kosovën, duke e cilësuar atë si “Djepin e Serbisë”, zëvendëskryeministri serb Ivica Daçiç deklaroi nga vendi i tij, se Serbia as në muajin mars nuk do të bëjë hap të rëndësishëm për marrjen e statusit të kandidatit për anëtarësim në BE, në rast se nuk njeh pavarësinë e Kosovës.
Deklaratën e Daçiç e bëri të ditur media serbe Blic.
“Le të mos gënjejmë më dhe të mos tregojmë më përralla. Pasi kusht i BE-së është njohja e Kosovës. Kjo na kërkohet”, citohet të ketë thënë Daçiç.
Zëvendëskryeministri i Serbisë akuzoi sakaq bashkësinë ndërkombëtare, që sipas tij tradhtoi shpresat e qytetarëve serbë.
Sipas Daçiç, në krye të herës në vitin 2000, ndërkombëtarët i kishin kërkuar Serbisë për integrimin në BE, vetëm largimin e kryekriminelit serb Sllobodan Millosheviç, por nuk e kishin përmendur asesi njohjen e pavarësisë së Kosovës.
“Atëherë askush nuk e përmendte pavarësinë Kosovës dhe pas 11 vjetësh ende nuk mund ta marrim statusin e kandidatit. Kë duhet të ndërrojmë dhe kë duhet të dërgojmë në Hagë”, u shpreh Daçiç, duke nënvizuar se mosdhënia e statusit të kandidatit është një padrejtësi që i bëhet Serbisë.
NOA
