Prishtinë, 14 Dhjetor 2011, NOA/ Rid Bulku – Ka qenë duke ecur normalisht në rrugë dhe po shkonte në punë të tij, vetëm se në ecje e sipër e shoqëronte edhe një armë zjarri që e mbante me vete. Pikërisht kjo armë ju bë sebep i një prag gjakderdhjeje kur u irritua shumë se disa njerëz po e pengonin të kalonte rrugën normalisht.
E gjithë ngjarja ka ndodhur dje në orën 19.15 në rrugën “Nazim Gafurri”, në Prishtinë, raporton agjencia e lajmeve NOA.al.
I riu po kalonte në vendkalimin e këmbësorëve duke përshkuar nga një cep i rrugës në tjetrën, më këmbë, zonën ku po shkonte për në shtëpi.
Në këtë moment një automjet me tre persona ka kaluar dhe nuk e ka lënë të ecë duke e penguar.
Në atë moment, i riu është nxehur. Pa një e pa dy, ka nxjerrë nga brezi një pistoletë dhe ka futur fishekun në tytë (gojë) duke e bërë gati për shkrehje.
Momenti ishte i frikshëm sepse për pak ai ishte duke hapur zjarr, por befas iu thirr nga tre personat që ndodheshin në veturë, se ishin punonjës policie.
I riu ka arritur të bindet se ndonëse me veshje civile ata ishin vërtetë oficerë policie dhe e ka ulur armën.
Lidhur me ngjarjen, policia lokale e konfirmoi zyrtarisht duke pohuar edhe arrestimin e personit të armatosur.
Policia sqaroi se “personi që më pas doli se ishte i armatosur, derisa ishte duke kaluar rrugën ne vendkalim te këmbësorëve, u pengua nga një makinë. Në këtë makinë gjendej njësiti Policor në një operacion dhe forcat policore ishin të veshur me rroba Civile dhe me veturë civile”, - konfirmoi policia.
Ajo detajoi se “njësiti policor pasiqë nuk i kishte dhënë përparësi kalimi këmbësorit, më pas është ndalur duke i kërkuar atij falje. Por megjithëkëtë, ai ka nxjerrë revolen duke e futur në tytë fishekun me ç’rast i kanosur katër oficerët antikrim të policisë së Prishtinës.
Pas këtij incidenti, nga i dyshuari që u arrit të vihej në pranga pa rezistencë të mëtejshme, është konfiskuar një revole e tipit Vizor, një karikator dhe shtatë fishekë të kalibrit 7.65 mm. Me urdhër të prokurorit i dyshuari dërgohet në mbajtje kurse rasti është nën hetime.
r.b/NOA
