Tiranë, 26 dhjetor 2011, NOA – Pas miratimit me shumicë votash në seancën e fundit parlamentare për këtë vit, Avokati i Popullit Igli Totozani ka marrë sot zyrtarisht detyrën për një mandat 5-vjeçar me të drejtë rizgjedhjeje, raporton agjencia e lajmeve NOA.al.
Juristin Totozani e prezantoi sot në zyrën e Avokatit të Popullit, nënkryetari i grupit parlamentar socialist Namik Dokle.
Ashtu siç kishte premtuar edhe gjatë prezantimit të tij të parë në Kuvend, Igli Totozani deklaroi se do të udhëhiqej në punën e tij vetëm nga drejtësia dhe se detyrimi i tij madhor si Avokat i Popullit është mbrojtja e të drejtave dhe interesave të qytetarëve shqiptarë.
Më herët Totozani kishte premtuar se do të punonte për një institucion të pavarur politikisht, një deklaratë që binte ndesh me komentet e mazhorancës për Totozanin, e cila e quajti atë një zgjedhje politike nga opozita në pozicionin kushtetues të Avokatit të Popullit.
Megjithkëtë, në votimin e fshehtë të së enjtes së shkuar, kandidatura e vetme për postin e Avokatin të Popullit, Igli Totozani, i propozuar nga Partia Socialiste u miratua me 127 vota pro, 2 vota kundër dhe 3 abstenim, duke marrë kështu shumicën dërrmuese të votave, e duke bërë të përmbushej edhe premtimi i kryeministrit, që garantoi votimin e propozimit të opozitës.
Juristi Igli Totozani u mbështet nga opozita për shkak se siç tha ajo, juristi nuk ka qenë asnjë ditë pjesë e strukturave të Partisë Socialiste dhe kësisoj do të mbronte në mënyrë të pavarur pozitat e qytetarit.
Avokati i Popullit Igli Totozani deklaroi në nisjen e detyrës së tij se me miratimin e Avokatit të Popullit, politika shqiptare përmbushi një nga 12 rekomandimet e Komisionit Evropian të lëna detyrë shtëpie për klasën politike, për marrjen e statusit të vendit kandidat, një shans i humbur nga vendi ynë prej dy vitesh radhazi.
Pas betimit, Avokati i Popullit Igli Totozani mori edhe urimet e Kryetares së Kuvendit, Jozefina Topalli, për detyrën e re.
Avokati i Popullit Igli Totozani, i njohur si pedagog i Drejtësisë dhe analist për çështjet juridike, ka një përvojë disa vjeçare në fushën e Jurisprudencës, për të cilën është laureuar në Gjenevë të Zvicrës.
mit/NOA
