Prishtinë, 30 dhjetor 2011, NOA - Misioni i Bashkimit Evropian për sundimin e ligjit, EULEX qartësoi se do të jetë të paktën edhe për dy vjet në Kosovë me kompetencat e plota ekzekutive si deri më tani.
Zyrtarë të EULEX- it i thanë Radio Kosovës se po presin një plan të detajuar nga Brukseli rreth fushëveprimit të mëtejmë të këtij misioni.
EULEX, vlerëson se institucionet e Kosovës janë ende të dobëta për të marrë përsipër disa fuqi ekzekutive që ka aktualisht ky mision.
Zëdhënësi i këtij misioni në Kosovë Ane Blaksma, tha se po presin një plan për platformën e punës së EULEX- it në vitet në vazhdim, që po shqyrtohet në Bruksel. “Aktualisht një rishikim strategjik rreth EULEX-it është duke u bërë në Bruksel, i cili do të përcaktojë misionin EULEX-it për dy vitet që vijnë. Kjo ndoshta do të përfshijë disa bartje të përgjegjësive tek vendorët. Plani do të paraqitet tek shtetet anëtare të BE-së për një vendim përfundimtar në fillim të 2012-ës”, tha Blaksma.
Zëdhënësi Blaksma, nënvizoi se kalimi i përgjegjësive dhe largimi i EULEX-it mund të vijë vetëm atëherë kur autoritetet e vendit të mund të garantojnë vetë sundimin e ligjit në Kosovë.
mit/NOA
