Këshilli Organizativ për Shënimin e 5-vjetorit të Pavarësisë së Kosovës, i cili udhëhiqet nga zëvendëskryeministri dhe ministri i Drejtësisë së Kosovës, Hajredin Kuçi, ka mbajtur dje një takim pune ku është diskutuar roli, angazhimi, detyrat dhe përgjegjësitë e këtij Këshilli që do të bartë barrën kryesore të organizimit për shënimin e këtij përvjetori.
Në takim ku kanë marrë pjesë edhe ministri i Forcës së Sigurisë së Kosovës, ministri i Kulturës, Rinisë dhe Sporteve, përfaqësues nga Zyra e Presidencës, Kuvendi i Kosovës, Komuna e Prishtinës, Rektori i Universitetit të Prishtinës, zëvendësministri i Punëve të Jashtme , zëvendëskomandanti i FSK-së, drejtori i Zyrës së ish –TMK-së, përfaqësues nga Protokolli i Shtetit, etj, është dakorduar për një koordinim sa më të mirë të aktiviteteve të të gjitha institucioneve që do të jenë pjesë e organizimeve shtetërore për nder të Ditës se Pavarësisë.
Këshilli Organizativ për Shënimin e 5-Vjetorit të Pavarësisë në këtë takim është pajtuar edhe për formatin e festimeve për nder të Ditës së Pavarësisë.
Ceremonitë kryesore do të jenë :
• Akademia Solemne dhe Koncerti i Filharmonisë së Kosovës ,
• Parada e Pavarësisë,
• Homazhe në Varrezat e Dëshmoreve në të gjithë Kosovën,
• Seanca Solemne e Kuvendit të Kosovës ,
• Koncerti i Pavarësisë që do të organizohet në sheshin “ Nënë Tereza “, etj.
Pjesë e festimeve për Ditën e Pavarësisë do të jetë edhe shënimi i Përvjetorit të Themelimit të Universitetit të Prishtinës, i cili është më 15 shkurt. Ky aktivitet do të koordinohet me Rektoratin e Universitetit të Prishtinës .
Ceremoni festive do të organizohen edhe në të gjitha komunat e Kosovës, ndërsa ambasadat e Kosovës në botë do të organizojnë pritje për nder të Ditës së Pavarësisë.
Kryetari i Këshillit Organizativ, zëvendëskryeministri Hajredin Kuçi ka kërkuar nga anëtarët e Këshillit Organizativ angazhim maksimal në mënyrë që Festa e Pavarësisë të jetë sa më dinjitoze.
